Jógvan Asbjørn Skaale farin

Jógvan Asbjørn Skaale var tann fyrsti á skíggjanum tann 1. apríl í 1984, tá ið Sjónvarp Føroya fór at senda.

Hann var kendur og íðin sjónvarpsmaður. Hann var fyrsti stjórin í Sjónvarpi Føroya frá 1984 til 1993.

Undan tí var hann formaður í Sjónvarpsfelagnum. Sjónvarpsfelagið var ein roynd hjá einstaklingum at fáa føroyskt sjónvarp.

Sum formaður var hann ein av undangongumonnunum, sum løgdu trýst á politisku skipanina at fáa eitt alment føroyskt sjónvarp.

Jógvan Asbjørn Skaale var útbúgvin lærari og var eisini kendur listamaður. Hann var 73 ár, nú hann andaðist.