Spøkilsismál gav javnleik

Tá dysturin millum mansliðini hjá Neistanum og VÍF í gjár var liðugur, vísti máltalvan javnleik, 35 - 35.

Men alt bendir á, at Neistin hevur fingið eitt mál ov nógv frá dómaraborðinum, tí sjónbandatilfar vísir, at Neistin skorar 'bara' 34 mál. 

Tá níggju minuttir eru eftir at spæla, kemur steðgur í dystin. Støðan er tá 28-30.

Ein uppteljing verður síðan gjørd, og støðan verður rættað til 29-30. Neistin fær sostatt eitt mál afturat.

Skot við síðuna av

Sambært dómaraseðlinum minkar Jónsvein Dulavík um munin til 24 - 26, tá 15 minuttir eru spældir í seinna hálvleiki, men upptøkurnar hjá Kringvarpinum vísa, at sami Jónsvein Dulavík onki mál fær í dystinum.

Málið, sum hann verður skrásettur fyri, kemur í 15. minutti í seinna hálvleiki, men tá fer bólturin við síðuna av.

Venjarin hjá VÍF fegnast um avrikið hjá sínum spælarum og finst samstundis hvassliga at dómarastiginum. 

– Teir hava ikki tamarhald á dystinum. Mínir spælarar hava vant sera væl seinastu tíðina, og so møta teir hesum. Tað er sera óheppið, sigur John Larsen, venjari hjá VÍF.

Rasmus Søby hjá Neistanum sigur seg ikki sakna málið, sum verður lagt afturat, tá støðan verður broytt frá 28 - 30 til 29 - 30.

– Í mínum høvdi var støðan 28 - 30, sigur royndi Neistaspælarin.