Fíggjarmálaráðið hevur tamarhald á eftirlønunum

Í nógv ár hevur Landsgrannskoðanin gjørt vart við, at einki er gjørt fyri at leggja uppfyri eftirlønarskyldurnar hjá landskassanum.
Tænastufólk eiga tríggjar milliardir og 325 milliónir krónur í eftirløn, og pengarnar eiga tey at fáa úr landskassanum. Í talinum er roknað við einum prosenti í rentu.

Eftirlønirnar hjá løgtingsfólkum og landsstýrisfólkum eru ikki roknaðar við í nevndu upphæddini. Tað verður arbeitt við at rokna seg fram til hvussu nógv talan er um, og Fíggjarmálaráðið ætlar at tað arbeiði skal vera liðugt fyri árslok.
Jørgen Niclasen, landsstýrismaður í fíggjarmálum, viðgongur, at eftirlønirnar eru ein avbjóðing. Men hann ræðist ikki avbjóðingina, og tamarhald er á støðuni, sigur hann.