Pál hevur møguleika fyri heiðursmerki í Rio

Fyrrverandi svimjarin, Pauli Øssurson Mohr, heldur, at Pál Joensen hevur góðan møguleika at vinna heiðursmerki á Olympisku leikunum í Rio, eftir at vágbingurin sunnudagin svam seg til eitt fjórða pláss á heimsmeistarastevnuni í stuttgeil.

Við tíðini 14.26.54, setti Pál nýtt føroyskt met, og hóast tað ikki rakk til heiðursmerki á hesum sinni, so heldur Pauli, at Pál er í eini somikið góðari gongd í løtuni, at hann kann røkka heiðursmerkjapallinum á sumri 2016.