Tveir krossar kundu tryggjað lokalu økini

Ein serfrøðinganevnd, sum formansskapurin í Løgtinginum í 2010 setti at endurskoða valskipanina, arbeiddi millum annað við møguleikanum, at fólk velja bæði lokal og landspolitisk valevni.

Hetta skal bæði tryggja lokalu økjunum umboðan í løgtinginum, samstundis sum veljarin fær møguleika at velja valevnir uttan fyri gomlu valdømini.

Slíkar skipanir finnast í øðrum londum, sigur Petur Zachariassen, støddfrøðingur, sum var formaður í serfrøðinganevndini.

Eitt spurnarumfar, sum Norðlýsið hevur gjørt millum løgtingsfólk seinastu dagarnar, vísir, at meirilutin av løgtingslimum halda, at føroyar ikki longur eiga at vera eitt valdømi. Men tað er kortini ikki meiriluti fyri at venda aftur til gomlu skipanina við sjey valdømum.

Onkrir av løgtingslimunum nevna møguleikan fyri eini blandaðari skipan, har veljarin fær loyvi at seta tveir krossar.