Strongd er sum alkoholisma

- Tú kanst samanlíkna strongd við alkoholismu.

Tað sigur Niclas Heri Jákupsson, ið er stress-coach og hjálpir fólki at fáa ein minni strongdan gerandisdag. Eisini hevur hann sjálvur uppliva strongd á egnum kroppi.

- Tað eru altíð tey avvarandi, sum streingja á við at fáa tann strongda í viðgerð, júst eins og tað er við alkoholikarum, sigur Niclas Heri Jákupsson og vísir á, at fólk við strongd duga ikki at síggja, at halda tey fram við strongda lívsstílinum, gongur galið fyrr ella seinni.

- Tey blíva júst sum ein speigipylsa, har tunnar skivur verða skornar av hvønn dag. Øll onnur duga at síggja broytingina, men ikki persónurin sjálvur, sigur Niclas Heri Jákupsson.

Sambært eini kanning, sum Gallup gjørdi í fjør, hava heili 30 prosent av føroyingum havt illgruna um strongd seinastu 12 mánaðirnar. Kortini eru tað bert níggju prosent, ið eru farin til lækna at leita sær hjálp.

- Hesi tølini vísa eisini, at vit hava lyndi til ikki at vilja kennast við, at vit eru strongd. Eingin vil jú vísa sínar veikleikar, sigur Niclas Heri Jákupsson.

Í morgunsendingini greiddi hann millum annað frá, í hvørjum vinnum flest fólk eru strongd, og hvat fyritøkur kunnu gera, fyri at sleppa undan strongd á arbeiðsplássinum.