Solariumlógin eingin endalig loysn

Fyri skjótt tveimum vikum síðani bleiv nýggja solariumlógin samtykt. Hetta var triðju ferð, at uppskotið bleiv lagt fyri Tingið.

Í Krabbameinsfelagnum ivast tey tó í, hvussu væl nýggja lógin riggar.

- Lógin er eitt stig rætta vegin, men avgjørt eingin endalig loysn, tá hugsað verður um at fáa tey ungu at halda uppat við at brúka solariumsól, sigur Jansy Gaardlykke, sum er dagligur leiðari í Krabbameinsfelagnum.

- Tað eru hol í lógini, og tí rokna vit við, at tað kann blíva torført at halda lógina, sigur Jansy Gaardlykke. Eitt nú eru ómannaðar sólstøðir framvegis loyvdar, men eisini har skal 18 ára aldursmarkið haldast.

- Tíðin vil vísa, hvussu henda lógin riggar í veruleikanum, sigur Jancy Gaardlykke.

Í morgunsendingini fortaldi hon millum annað, hví Krabbameinsfelagið ikki er ovurfegið um nýggju solariumlógina.