- Tíðindi, mentan og ítróttur
Góðan morgun Føroyar
Tú ert í biografi, og tað er bølamyrkt. Men ístaðin fyri at síggja film á lørifti, so hoyrir tú ymisk ljóðbrot.
Fríggjakvøldið ber til at fara í fyrsta føroyska útvarpsbiografin nakrantíð, tá ein heilt serliga søgan verður at hoyra.
Tað er Linda Mortansdóttir, systir Rasmus Rasmussen, sála, sum fer at fortelja søguna um tvíburðabróðurin.
- Ein útvarpsbiografur er júst sum ein filmsbiografur, men heldur enn at hyggja lurtar tú eftir eini søgu. Tú situr í myrkri, og sostatt er lættari lurta, tí einki órógvar, og tú hevur lættari við at skapa tínar egnu myndir, sigur Linda Mortansdóttir, sum skipar fyri tiltakinum.
Umframt at fólk kunnu fáa eina serliga uppliving, er hetta ein møguleiki at stuðla Fountain House, ið er ætlað fólki, ið onkursvegna hava tað torført sálarliga.
Í morgunsendingini fortaldi Linda Mortansdóttir um hetta serstaka tiltakið, sum verður á Tjóðpalli Føroya fríggjakvøldið klokkan 20.00.