Grannskoðarar sleppa ikki í Hægstarætt

Grannskoðararnir í nógv umrødda grannskoðaramálinum sleppa ikki í Hægstarætt við málinum.

Danska Processbevillingsnævnet, sum tekur støðu til, hvør sleppur í Hægstarætt við kærumálum, metir ikki, at málið er nóg prinsipielt at royna í Hægstarætti.

Advokaturin hjá granskoðarunum, Christian Andreasen, harmast um avgerðina, tí eftir hansara tykki var málið nóg prinsipielt at kunna fara í Hægstarætt.

Málið snýr seg um tveir grannskoðarar, sum vildu hava rættin at ógilda avgerðina hjá Løgmansskrivstovuni um at strika løggildingina, sum grannskoðararnir fingu í 2007.

Málið byrjaði í 2010, og grannskoðararnir stevndu Løgmansskrivstovuni í 2012.

Bæði Føroya Rættur og Landsrætturin hava fríkent Løgmansskrivstovuna.

Grannskoðararnir sum stevndu Løgmansskrivstovuni vóru upprunaliga fýra, men tá dómsviðgerðin var, vóru teir bert tveir. Hinir eru farnir í aðra vinnu.

Meiri verður at frætta í útvarpstíðindunum.

Mynd: Christian Andreasen er advokatur hjá grannskoðarunum.