Danska Emma Holten gjørdist heimskend, tá hon sjálvboðin legði gerandismyndir út á netið, har hon er toppleys. Hetta var eitt aftursvar til eitt sokallað hevndarpornoálop. Við aftursvarinum ynksti Emma at varpa ljós á samtykki, og hví samtykki er altavgerandi, tá tað snýr seg um rættin til okkara kropp.
Síðani er hon vorðin ímyndin upp á feminismu. Og tað eru ikki bara danskir miðlar, sum hava varpað ljós á hennara søgu, ið er umsett til tíggju ymisk mál.

Leygardagin vitjar Emma Holten í Føroyum. Tað er Amnesty Føroyar, ið hevur bjóðað henni henda vegin. Fyri at bøta um umstøðurnar hjá neyðtøkuofrum skipar Amnesty fyri almennum tiltaki um samtykki við Emmu Holten, politiskur aktivist, og Súna Poulsen, sálarfrøðingi.

Tað verður leygarkvøldið í Perluni í Havn klokkan 19.30. Tiltakið er ókeypis.