t onnur okkara eta.

Veganarlívsstílurin vindur meir og meir upp á seg í londunum rundan um okkum, og tað eru eisini føroyingar, sum eru veganarar.

Guðrun Mortensen og Una Nielsdóttir Galán liva veganskt. Tað vil siga, at tær eta einki, ið kemur frá djórum og brúka heldur einki, sum hevur havt við djór at gera.

- Tað byrjaði við, at eg las okkurt á netinum um veganarar, og onkursvegna gav tað bara meining. Eg elski djór og havi bara ikki hug at eta tey. Harafturat snýr hetta seg eisini um at eta heilsugott og hugsa um umhvørvið, so tí eri eg veganari, sigur Guðrun Mortensen.

Fyri Unu Nielsdóttir Galán byrjaði veganski lívsstílurin fyri umleið tveimum árum síðani.

- Eg hevði í nøkur ár havt trupulleikar við búkinum og hevði ofta pínu, og tá eg so fyri tveimum árum síðani var á háskúla hitti eg ein veganara, og so gjørdi eg eina roynd at leggja kostin um. Líka síðani eg fór at liva sum veganari havi eg havt tað nógv betri, eri ikki líka troytt og eri sloppin av við pínuna í búkinum, fortelur Una Nielsdóttir Galán.

Í morgunsendingini fortaldu tær um veganska lívsstílin, og harafturat høvdu tær ymiskan veganskan mat við í útvarpsstovuna, sum vertirnir smakkaðu.