Um tú gongur runt við einum dreymi um at gerast filmssjónleikari, so hevur tú kanska møguleikan nú.

Í morgin verður upptøkuroynd í Sjónleikarhúsinum, har tey skulu finna leikarar til ein nýggjan spælifilm, ið nevnist El imaginarium de Bruno Domenech.Hóast spanska heitið og at lekstjórin eisini er spanióli, so er talan um ein føroyskan spælifilm.

Filmurin snýr seg í stuttum um spaniólan Bruno, ið hevur føroyska unnustu, og tí kemur til Føroya at búgva. Tey bæði reka Sjónleikarhúsið, men brádliga byrjar alt at blíva heldur løgið. Eitt nú ivast Bruno í, hvørt tað spøkir í húsinum, ella um tað einans er hann sjálvur, ið sær fyri sær.

Upptøkurnar til filmin byrja eftir ætlan í september, men í morgin, mikudagin, skulu føroysku leikararnir finnast.

Hanna Flóvinsdóttir er við til at stíla fyri upptøkuroyndini, og í morgunsendingini fortaldi hon um verkætlanina.