Leygarkvøldið 30. juni verður Voxbotn 2018, ið eisini verður kallað "Ársins konsertdagur", har útlendsk og føroysk nøvn fylla Vágsbotn við kendum tónum.  

Rúni Djurhuus er fyriskipari, og í morgun kunngjørdi hann fyrsta bólkin, ið verður at hoyra hetta kvøldið: Nephew.

Einki hevur verið at hoyrt frá bólkinum tey seinastu fýra árini. Fyri stuttum bórust tíðindi í donsku miðlunum um, at Nephew hevði kunngjørt nýggja konsertferð, men einki varð sagt um, at Nephew fór at upptraðka her heima.

Bólkurin kunngjørdi tríggjar konsertir í Danmark, og tvær teirra eru longu útseldar. Ein fjórða konsert verður tó eisini, og hon verður á Voxbotn tann 30. juni. 

Forsangarin í Nephew, Simon Kvamm, er ættaður úr Gøtu, og hevur Nephew eisini spælt nakrar ferðir á G! festivalinum. 

Tey seinastu árini hevur Voxbotn bjóðað gestum tónleikanøvn úr øllum heiminum. Millum annað hava L.O.C, Thomas Helmig og Marius fyrr verið at hoyrt á Voxbotn. 

Hoyr Rúna Djurhuus kunngera og greiða nærri frá, hvussu tað ber til, at Nephew kemur hendan vegin næsta summar.