Myndatúrar við ferðafólki

Høgni Reistrup eigur og rekur heimasíðuna Guide To Faroe Islands. Hetta er eitt stað á alnótini, sum vísir á tilboð til ferðafólk í Føroyum. Málbólkurin er serliga útlendingar, sum koma til Føroya at ferðast. Ein, sum bjóðar seg fram á heimasíðuni, er Ditte Mathilda Joensen, fotografur. Hon skipar fyri túrum, sum snúgva seg um at taka myndir av úrvaldum støðum í Føroyum, eitt nú Trælanípuni við Leitisvatn. "Eg vil gjarna vísa á nýggjar vinklar", sigur Ditte men leggur afturat, at trygdin er tað týdningarmesta. "Er veðrið ikki til vildar, fara vit ikki niðan á toppin", sigur Ditte. Hóast talan er um myndatúrar, er ikki neyðugt, at fólk hava fínt myndatól við - fólk kunnu eins væl taka myndir við fartelefon, tí, sum Ditte sigur, snýr tað seg um at hava okkurt at fortelja við myndum. Hoyr samrøðuna her