Ofta sníkja ensk orð seg inn í føroyskt, og tað kann føra til misskiljingar.

Eitt dømi um hetta var, tá orðið, 'todlari', varð brúkt um eitt barn í vøggustovualdri.

- Tað ber illa til at brúka á føroyskum, tí orðið er longu upptikið, sigur Elin Henriksen, málkøn, og mælir til at brúka onnur orð.

Eldri orð sum óviti og lítlingur kunnu brúkast, men í sendingini komu eisini tvey uppskot afturat.

Annað er tøtlari, sum kemur av orðinum, at tøtla, og hitt er stetlari, sum kemur av orðinum, at stetla.

Stú og stúgvur
'Ríða vit um fjøllini at keypa abba stú', er regla úr kendum barnasangi.

Stú er tað sama sum stúgvur, og Elin Henriksen greiðir frá orðinum og skerpingini.

Nær skulu vit brúka vælgagnist, spyr lurtari, sum ofta hoyrir vælgagnist, tá fólk millum annað takka gestum í miðlunum.

Hesa vikuna eru fyrisetingarnar, millum, til, vegna, innan og uttan, til viðgerðar.

Hesar stýrdu fyrr hvørsfalli, men nú stýra tær einamest hvønnfalli.