- Nú sleppa øll at lata skeivar sjálvuppgávur inn

Siðsta orðið tykist vera sagt í Skattamálinum.

Fútin hevur slept málinum um møguliga skattafrádráttin, tí so nógv ivamál í málinum. Ein grundgeving er, at tað kann hava verið torført hjá Eik at vita, hvussu bankin skal fyrihalda seg við sjálvuppgávuni, tá sjálvt grannskoðarar eru á ymiskum máli.

Ein onnur grundgeving er, at so nógv ivamál altíð koma tí ákærda til góðar.

Politiið gevst at kanna málið um Betri

Jan undrast

Men spyrst tú Jan Lamhauge, journalist, sum hevur arbeitt nógv við málinum - bæði í Degi og Viku og tveimum sjónvarpssendingum og síðani í bók - so er avgerðin hjá fútanum undarlig.

 - Eg undrist yvir, at fútin er so vísur í, at tað ikki er revsivert at lata so nógvar skeivar sjálvuppgávur inn, sigur Jan Lamhauge, sum heldur, at fútin í minsta lagi átti at latið eitt so prinsipielt mál viðari til rættarskipanina at taka støðu til.

Avgerðin skapar fordømi

Hann heldur, at avgerðin at sleppa málinum kann skapar fordømi.

 - Eg gangi út frá, at nú hava øll í Føroyum trý skot í byrsuni, tá tú gert sjálvuppgávur, sigur Jan Lamhauge og sipar til, at bankin heilar tríggjar ferðir rættaði uppgávuna.

Triðja ferðin var enntá, eftir at ein triði partur hevði gjørt vart við skeivleikar í roknskapinum.

Fútin ger greitt í skrivinum í gjár, at hann ikki ger fleiri viðmerkingar til málið enn tað, sum stendur í skrivinum.

N.B. Finnur Koba, sum ger samrøðuna, og Jan Lamhauge, journalistur, kennast væl frá starvstíðini í Kringvarpinum.