– Eg mátti heita á fólk um at lata seg kanna

Dátueftirlitið hevði ikki góðkent avtaluna millum Heilsumálaráðið og smápartafelagið Thetis, tá fyrsta flogfarið í dag lendi í Vágum klokkan 13:54.

Tað var annars hósdagin 18. juni, at landsstýrið boðaði frá, at frá í dag at rokna skulu øll ferðandi til Føroya kannast fyri koronusmmittuna. 

Uttan neyðugu heimildina kundi Pál Weihe, læknafakligur ábyrgdarpersónur fyri korona-kanningarnar, tí bara heita á ferðadi við seinnapartsflogfarinum um at lata seg kanna fyri korona. Tey ferðandi noyddust at skriva undir, at tey vilja lata seg kanna sjálvboðin, og tað elvdi til nakað av bíðitíð.

Sambært Pál Weihe vórðu 125 koronakanningar gjørdar av ferðandi við seinnapartsflogfarinum. Seks fólk vildu ikki lata seg kanna, eitt nú tí at tey mettu seg kunna vísa á eina nýggja koronakanning.

– Í prinsippinum veit eg ikki, um hesi seks fólkini eru smittað við korona, viðgongur Pál Weihe, sum tó vónar tað besta.

Tey 125 fólkini, sum vórðu kannað í Vágum seinnapartin, fáa væntandi svar í kvøld.

Seint seinnapartin góðkendi Dátueftirlitið avtaluna millum Heilsumálaráðið og sp/f Thetis, og tí er tvungna skipanin, har øll ferðandi skulu kannast, nú farin at virka.

Avtalan millum Heilsumálaráðið og Thetis er galdandi til og við 10. juli. Enn er ógreitt, hvør skipan verður galdandi eftir tann dato.

Hoyr samrøðu við Pál Weihe við at trýsta á pílin undir myndini.