Ferðafólkini eiga sjálvi at rinda koronukanningina

Síðan 27. juni eru øll fólk, sum eru komin til Føroya, kannað fyri koronu. 

Landskassin hevur borið kostnaðin. Higartil eru 10 milliónir krónur settar av til kanningarnar.

Í fyrsta umfari vóru fýra milliónir krónur settar av.

Og fíggjarnevndin hjá Løgtinginum játtaði hósdagin landsstýrinum seks milliónir krónur afturat til koronukanningar í juli.

Bæði Magnus Rasmussen úr Sambandsflokkinum, og Beinta Løwe úr Tjóðveldi halda, at landskassin eigur ikki at rinda fyri kanningarnar eftir 1. august.

Ætlanin var upprunaliga, at ferðafólk skuldu sjálvi rinda fyri kanningarnar.

Men landið hevur ikki heimild at krevja tað frá fólki.

Ein kanning, sum spyr.fo gjørdi fyri Kringvarpið í vikuni, vísir, at 56,4 prosent av teimum spurdu hildu, at ferðafólk eiga at gjalda fyri kornonukanningina. 

32,6 prosent hildu, at landið eigur at gjalda.