Eitt starvsfólk á KOKS hevur koronu

Næstan allur starvsfólkahópurin hjá KOKS er í sóttarhaldi, tí eitt starvsfólk fekk staðfest koronu í gjár.

KOKS er tí stongt komandi tvær vikurnar, sigur Poul Andrias Ziska, høvuðskokkur á KOKS.

Tey hava boðað gestum frá og royna at umbóka so nógv, sum tey kunnu, men fleiri eru útlendingar, sum ikki kunnu umbókast.

- Tey skilja tað øll og eru hørm um støðuna okkara vegna, sigur Poul Andrias Ziska.

KOKS lat ongantíð upp sum ætlað í gjárkvøldið, tí tey fingu boðini um morgunin

Poul Andrias Ziska er ikki bilsin, tí so nógv hava antin verið smittað ella ávirkað seinastu tíðina.

- Tað er sjálvandi harmiligt, men einki yvirraskar meg meira, hetta er ein so løgin tíð, sigur hann.