Eyðdis riggar av sum borgarstjóri

1. januar fer Eyðdis Hartmann Niclasen aftur í starv sum stjórnarskrivari í Smyril Line.

Hon takkar samstundis fyri seg sum borgarstjóri í Vága kommunu.

Hon bjóðaði seg fyri fyrstu ferð fram í politikki á kommunuvalinum fyri fýra árum síðan.

Hon fekk fjórðflestar atkvøður í Vága kommunu, 55 í alt, og samráddi seg í sessin sum borgarstjóri.

Eyðdis Hartmann Niclasen var vald á einum nýggjum lista, Lista V, ið segði seg vilja síggja kommununa við nýggjum eygum.

- Eg ætli mær ikki at verða livibreyðspolitikari, og ætlanin var ongantíð at vera borgarstjóri meira enn fýra ár. Mær leingist eisini aftur í starvið í Smyril Line, sigur hon um orsøkina til, at hon nú takkar fyri seg.

Eyðdis Hartmann Niclasen bjóðaði seg eisini á løgtingsvalinum í fjør. Hon var nummar 11 á sambandslistanum og hevur okkurt stutt tíðarskeið havt sætið sum varafólk í Løgtinginum.

Hon hevur ikki tikið støðu, um hon bjóðar seg fram aftur á komandi løgtingsvalið.

Hoyr longri samrøðu við Eyðdis Hartmann Niclasen við at trýsta á pílin omanfyri.