Ársins ítróttaátak: Special Olympics-fótbóltsliðið

Ársins ítróttaátak er eitt felag, samband ella annað, sum á onkran hátt hevur tikið stig til eitt átak, sum styrkir, mennir og/ella nýhugsar ítróttin í Føroyum á serstakan hátt. 

Og fyri árið 2022 er Special Olympics fótbóltsliðið kosið ítróttaÁTAKIÐ. 

Átakið styrkir og víðkar um felagsskapin

Special Olympic fótbóltsliðið er eitt átak við vikuligari venjing fyri vaksin við menningartarni. Men tað er ikki bara venjing. Liðið hevur eisini umboðað Føroya til altjóða kappingar við framúr úrslitum. 

Í oktober umboðaði liðið Føroyar í Special Olympics smálandakapping í Liktinstein. Dreingirnir avrikaðu sera væl og komu heim aftur sum vinnarar av B-bólkinum.

Umframt, at hetta var eitt avbera gott ítróttaligt avrik, so er talan eisini um eitt átak, sum á fyrimyndarligan hátt livir upp til treytirnar fyri at vera kosið ársins átak, skrivaði innstillingarnevndin í innstillingarkunngerðingini.  

Við tilboðnum um regluliga venjing fyri hesum málbólkinum, verður felagsskapurin styrktur og víðkaður soleiðis, at vaksin við menningartarni eisini eru virkin partur av fótbóltsfamiljuni.

Tilboðið er skipað í samstarvi millum HB, Parasport Føroyar og FSF.