- Tíðindi, mentan og ítróttur
Nón
Doru Tiberiu á Torvlaðnum kom til Føroyar sum flótti fyri 30 árum síðani - í 1989. Hann giftist við Guðrið Poulsen, sum hann frammanundan hevði hitt av tilvild í Spania. Tey eiga tvey børn, og í dag livur Doru eitt vanligt lív og arbeiðir sum útróðrarmaður.
Men fyrra partin av lívinum livdi Doru í kommunistiska Rumenia undir einaræðisstýrinum hjá Nicolae Ceaușescu.
Søgan hjá Doru er sera hørð og ógvuslig. Sum ungur las hann í fýra ár heimspeki við lærda háskúlan í Bukarest. Gerandisdagurin í Rumenia, varð fullkomiliga stýrdur av kommunistiska stýrinum. Frælsir, sum vit kenna til í Føroyum, sum eitt nú talufrælsi, vóru ikki til í Rumenia.
Í 1974 varð Doru dømdur 18 ára fongsulsrevsing fyri idelogiskt politiskt undirgravandi virksemi, og sat hálvt sætta ár í fongsli, áðrenn hann vart leyslatin. Tíðin í fongslinum, vil Doru helst ikki tosa um, men hann sigur, at tað var ein kampur fyri at yvirliva, og stórur partur av teimum, sum hann sat í fongsli sama við doyðu av ómenniskjasligu umstøðunum.
Sum 30 ára gamal - í 1984 - gjørdi Doru av at flýggja úr Rumenia. Doru gjørdi tvær royndir at flýggja, við at svimja einar 15 kilometrar um ánna Donau, men báðar ferðirnar varð hann tikin, og koyrdur aftur í fongsil, fyrstu ferð í Rumenia og aðru ferð í Jugoslavia.
Tað eyðnaðist tó Doru at flýggja úr fongslinum, og gekk hann síðani einar 700 kilometrar úr Jugoslavia til Grikkalands. Har sníkti hann seg umborð á farmaskip til Italia, og eftir vandafulla leið, endaði Doru í Vesturtýsklandi, har hann fekk politiskt friðskjól og status sum flóttafólk í 1986.
Doru fekk loyvi at arbeiða í Spania, har hann í 1989 av tilvild hitti Guðrið Poulsen, sum var á interrail. Eftir eina miseyðnaða roynd, har hann var tikin í Danmark, eyðnaðist tað Doru at sleppa umborð á Norrønu og at sigla til Føroyar, har hann giftist við Guðrið og hava tey fingið tvey børn.
Lurtið eftir allari samrøðuni við Doru, har hann greiður frá, hvussu tað var at liva í Rumenia í stýrinum hjá Nicolae Ceaușescu.