- Tíðindi, mentan og ítróttur
Nón
- Eg eri ikki sørt errin, tí Fiskaaling gjørdist ein sólskinssøga, sigur Edmund Joensen. Hann var við frá fyrsta degi, greiðir frá hvussu alt byrjaði og lýsir serliga slóðaran og undangongumannin Júst í Túni.
"Úr eyga til varandi aling" er heiti á nýggjari bók, sum Helgi Jacobsen hevur skrivað, nú P/F Fiskaaling hevur 50 ár á baki. Heitið lýsir søguna hjá Fiskaaling, sum er farið frá at framleiða fisk til at framleiða vitan.
Andrias Reinert var tann stillføri vísindamaðurin, og Júst í Túni var tann andbráði slóðarin og íverksetarin. Saman høvdu teir okkurt serligt.
Rithøvundurin Helgi Jacobsen greiðir frá nýggju bókini, og lýsir hvussu Andrias Reinert og Júst í Túni løgdu frá landi og løgdu lunnar undir alivinnuna, sum í dag stendur fyri helvtini av føroyska útflutninginum.
Jóhanna Lava Køtlum er í dag stjóri á Fiskaaling. Hon er eisini abbadóttir Júst í Túni. Hon greiðir frá, hvussu Fiskaaling í dag er vorðin ein ógvuliga framkomin fyritøka, sum er farin frá at klekja rogn til at klekja gransking.
Hoyr tey trý - Helga Jacobsen, Edmund Joensen og Jóhonnu Lava Køtlum - greiða frá lutum í søguni um Fiskaaling, sum byrjaði alla alivinnuna í Føroyum.