Tann 25. apríl kom triðja bind í tríbindaverkinum eftir Alexandur Kristiansen út. Bindið eitur Rímur á reki og fevnir um barnasangirnar og barnarímurnar, hann hevur yrkt, síðan hann gekk á læraraskúlanum.

Tað fyrsta bindið Fjøtrað á flogi fevnir um týddar yrkingar úr øllum heimunum og er eitt savn við alheimslyrikki á føroyskum, og annað bindið Veingir á hæli er hansara egnu yrkingar til vaksin.

Í sambandi við útgávuna skipaði forlagið Sprotin fyri fagnaðarløtu í Mentanarhúsinum í Fuglafirði við røðum, tónleiki og kórsangi fyri Alexanduri Kristiansen, sum hevur verið virkin í hálva øld.

Barnarímur og Cohen

Røðurnar halda Dávur Juul, Sirið Stenberg, Martin Næs, Signar á Brúnni og Sámal Matras Kristiansen.

Barnakórini í Fuglafjarðar skúla og Fuglafjarðar sangkór syngja sangir eftir Aleksandur Kristiansen.

Bárður á Lakjuni syngur Tak ein vals, sum Aleksandur Kristiansen hevur týtt úr enskum eftir Leonard Cohen.