Á gongutúri í Skopun greiðir fróðarmaðurin Edmund Nielsen frá ymiskum viðurskiftum í heimbygdini, bæði søguligt og aktuelt.

Tríggjar systrar úr Íslandi hava búð í Skopun í yvir 40 ár. Teimum dáma væl ginibitan, ið er eitt sereyðkenni fyri Skopun. Heiðrun Hansen, Ingibjørg Drangberg og Kristrún Kjærbo hava eisini verið við at lata Ítrivslonina upp í Skopun, har kvinnur úr allari oynni kunnu veva, seyma, binda og annað handarbeiði tá tær hava hug.

Ein verulig veðramentan hevur tikið seg upp í Skopun seinastu 15-20 árini, og vit eru við, tá veðrarnir hjá brøðrunum Schønning og Mads Kristoffur Hentze verða flettir. Millum mongu áskoðararnar er Hallmar Winther, sum sjálvur hevur nógvar veðrar. Jóhanna Sofía Hentze greiðir frá, at kvinnurnar gera nógv burtur úr matinum tá veðrarnir verða flettir, og øll verða boðin til borðs.

80 ára gamli Tórfinnur Hansen sigur frá hugtakandi søguni um træbeinið hjá pápanum Jóan Hendrikki. Hann fekk skaða umborð á skipi sum ungur maður og misti annað beinið. Tveir skopuningar gjørdu honum eitt træbein, sum bjargaði allari familjuni. Tórfinnur, sum var yngstur av 10 beiggjum, hevur træbeinið hjá pápanum í varðveitslu.

Kristvør Kolden hevur í summar skipað fyri einum serligum átaki í bygdini, sum ferðafólk eisini hava víst stóran áhuga. Skipað varð fyri søgutúrum í bygdini, har serlig skelti vístu allar handlar og tænastur, sum hava verið í Skopun.