- Tíðindi, mentan og ítróttur
Við Tórði á túri
Navnarnir Tórur í Puntabyrgi uttan ð og Tórður Mikkelsen við ð hava leingi havt eina avtalu um at gera ein túr saman á Verkstaðnum Vón á Argjum, har Tórur í Puntabyrgi dagliga arbeiðir. Umsíðir gjørdist hesin túrur veruleiki.
Navnarnir báðir vitja við mikrofonini pappírsdeildina, seymistovuna og timburverkstaðin, umframt at vitjað verður í ítrivshølinum niðri undir, har serliga glaslutir verða gjørdir til jólasøluna verða gjørdir í hesum døgum. Nøkur hava eisini sítt dagliga arbeiði í køkinum á Verkstaðnum Vón og har vitja teir báðir sjálvsagt eisini við mikrofonini.
Øll greiða fegin frá sínum arbeiði á verkstaðnum Vón, har tey trívast væl á arbeiðsplássinum.
Jólasølan stendur fyri durum og í hesum døgum er stórur spenningur um at fáa so nógvar lutir til søluna sum yvirhøvur gjørligt.
-Tann sosiali parturin á Verkstaðnum Vón hevur stóran týdning, umframt at tað er umráðandi at tey fáa ein dagligan dag við innihaldi í, sigur Fríðhild Debes, sum er eitt av starvsfólkunum.
Hon sigur, at tað er ymist sum brúkararnir eru fyri. Summi eru fullan dag á verkstaðnum og onnur eru nakrar fáar tímar um vikuna. Og so eru upp aftur onnur, ið bara arbeiða eitt sindur á Verkstaðnum Vón, tí tey eisini hava arbeiði aðra staðni.
Í sendingini er samrøða við hesi:
Vagnur Kjærbo, Guðrið Haraldsdóttir Jacobsen, Hildur Staksá, Marin Johannesen, Ella Elttør, Dánial Gram Høgnesen, Birgit Álaberg, Marjun Niklasdóttir, Fríðhild Debes, Jógvan Brøðraberg, Marianna Guttesen, Lennart Magnussen, Hervør Didriksen, Regin Samuelsen, Malan Mortensen, Bárður Nybo, Jórun Niclasen, Aimy Djurhuus, Elinborg Hansen.