Nú byrjar »Spískamarið« aftur

Saksun, Borðoy, Nólsoy, Elduvík, Sandoy og Koltur. Teir hava longu verið víða um í landinum og gjørt mat úr og í føroysku náttúruni - menninir, sum gera sjónvarpssendingina, »Spískamarið«.

Nú fara teir aftur á ferð. Arbeitt verður við seks nýggjum pørtum, har kokkurin, Gutti Winther, og manningin handan sendingina, fer at vísa tær sanna matgleði, sum er kjarnan í sendingunum.

Í fyrstu sendingini, sum kemur hóskvøldið 3. oktober, gongur leiðin til Skúvoyar, har farið verður eftir havhestaeggum og heintaðar verða urtir og grønmeti. Eggjakøka verður gjørd í Fagradali.

18 oyggjar - 18 matsendingar

– Dreymurin hjá okkum er at gera 18 matsendingar, soleiðis at vit koma runt alt Føroyar og fara at gera mat í øllum teimum 18 oyggjunum, sigur framleiðarin, Pætur Marjunarson Dahl.

Fyri trimum vikum síðani var manningin í »Spískamarinum« í Mykinesi, og gjørdi upptøkur frá súluveiðuni. Í Mykinesi gjørdi manningin Súlu til døgverða saman við bygdarfólkum.

Sí eisini Myndarøð: Mykinesmenn taka Súlu

Meðan tú bíðar eftir teimum nýggju pørtunum, kanst tú njóta teir fyrstu seks partarnar í røðini á slóðini her, har tú eisini sært uppskriftir: Spískamarið - sí sendingarnar her