Bygningurin kann ikki keypast enn til løgregluna

Tað verður ein løta enn, áðrenn danska Bygningsstyrelsen kann keypa bankabygningin í Húsagøtu í Havn frá Tórshavnar kommunu

Hesin bygningurin hjá BankNordik í Húsagøtu, ið løgreglan skal flyta inn í, kann ikki keypast enn. Tveir matriklar við bygningin mugu keypast, tí ein hædd skal byggjast oman á bankabygningin í Húsagøtu

Høgni Djurhuus

Bjarni Mohr

11.06.2015 - 08:14

Ætlanin er at keypa bygningin til politiið í Føroyum at leiga. Hjá Bygningsstyrelsen vilja tey bara siga, at tey tosa framvegis við Tórshavnar kommunu um BankNordik-bygningin.

Heðin Mortensen, borgarstjóri, sigur, at bygningurin er mettur at vera verdur 46 miljónir kr. Kommunan hevur einki goldið fyri hann enn, tað verður ikki fyrr enn næsta ár.

Ikki goldið enn

Bygningsstyrelsen ætlar at byggja eina hædd oman á bygningin. Fyri at kunna halda byggistigið, noyðist Bygningsstyrelsen eisini at keypa tveir matriklar við bygningin, annan frá Fiskimálaráðnum og hin frá kommununi.

Kommunan keypti fyri góðum tveimum árum síðani fýra bygningar í Havn frá BankNordik fyri 92 mió. kr. Talan er um bankarnar í Niels Finsensgøtu og Húsagøtu og bygningarnar sunnan fyri bankan í miðbýnum, har sum Guðrun og Guðrun og Skyn eru.

SÍ EISINI Ósamd um keypsprís

Heðin Mortensen sigur, at kommunan miðar eftir at fáa tað sama fyri bygningin, sum hann kostar kommununi. Kommunan skal ikki hava útreiðslur av bygninginum.

Virðismetingin, sum er gjørd fyri kommununa, sigur 46 miljónir kr. Bygningsstyrelsen hevur eisini fingið bygningin virðismettan. Heðin Mortensen sigur seg ikki vita, hvat tann metingin sigur.