Ivi um nýggju grindalógina

Ivi um nýggju grindalógina
Lógartænastan hjá Løgmansskrivstovuni ivaðist stórliga í lógarheimildunum. Men tað gjørdu hvørki Fiskimálaráðið ella løgtingið
 
03.08.2015 - 17:26

Fútin og ákæruvaldið eiga orðini í grindalógini um víðkaðu heimildirnar hjá politinum, sum eru skírdar at vera brot á grundlógina og heimastýrislógina, tí løgtingið kann ikki gera lógir um danskan myndugleika.

Lógartænastan hjá Løgmansskrivstovuni brúkti orðingina sera ivasamt um ætlanina hjá Fiskimálaráðnum at geva politinum víðkaðar heimildir í grindalógini, tí politiið í Føroyum er danskur myndugleiki, sum løgtingið ikki kann gera lógir um.

Fiskimálaráðið viðger ivan

Lógartænastan eftirkannar lógaruppskotini, sum landsstýrið ætlar at bera løgtinginum. Og Fiskimálaráðið viðger ivan hjá Lógartænastuni í viðmerkingunum um uppskotið um grindalógina.

Fiskimálaráðið sigur, at í roynd og veru eru fútin og ákæruvaldið í Føroyum høvuðssmiðir, tá ræður um uppskotini at víðka heimildirnar hjá løgregluni sambært greinunum 10 og 11 í grindalógini.

Uppskotið er gjørt við støði í teirra royndum at halda lóg og landaskil í sambandi við grind og tær royndir, tey hava gjørt sær í sambandi við rættarsókn í málum um brot á grindalóggávuna.

SÍ EISINI Bangin ferðafólk kunnu halda seg burtur

Fiskimálaráðið sigur seg væl skilja ivan hjá Lógartænastuni. Men ráðið metir seg ikki ført fyri at taka dagar millum, um tað stats- og ríkisrættarliga er innan fyri ella uttan fyri løgræðið hjá løgtinginum at áseta reglur í føroyskari serlóg, sum eisini umfata myndugleika hjá donskum myndugleika í Føroyum.

Men tað er ikki óvanligt at áseta reglur um eftirlit og handhevjan í føroyska serlóggávu, har heimildirnar hjá løgregluni eisini eru ásettar.

Samanumtikið heldur Fiskimálaráðið, at hóast løgreglan sum stovnur er donsk, útinna løgreglan og ákæruvaldið sín myndugleika í Føroyum sambært ríkislóggávu eins væl og føroyskari serlóggávu.

Kunnu heita á danskar myndugleikar

Halda fútin og løgreglan ikki, at tey hava nøktandi lógargrundarlag at virka eftir í Føroyum, so má embætið heita á danskar myndugleikar um at fáa formligu viðurskiftini skipað.

Fiskimálaráðið broytti ikki lógartekstin, hóast Lógartænastan ivaðist stórliga, og tað gjørdi Løgtingið heldur ikki. Nýggja grindalógin er samtykt uttan heimild í grundlógini og heimastýrislógini. Og tí má hon endurskoðast.

Tað segði Henrik Weihe Joensen, løgfrøðingur, sum hevur greinað grindalógina, í samrøðu við Útvarpið í gjár.

SÍ EISINI Grindalógin kann verða ógildug

Sambært lógini kann politiið halda fólki aftur í 12 tímar, áðrenn teir 24 tímarnir, sum annars eru treytin, tá politiið tekur fólk, byrja at telja. Lógartænastan vísir á, at í Danmark eru ásetingar sum tær í grindalógini í politilógini, sum ikki er sett í gildi í Føroyum.

Løgtingsskrivstovan eftirkannaði eisini lógartøknina í uppskoti Fiskimálaráðsins um grindalóg, men hevur ikki viðmerkingar um júst hatta við grundlógini, heimastýrislógini og politiið.

Grindalógin kom saman við nógvum øðrum lógum í tingið eftir seinasta framløgudag í vár. Bæði Lógartænastan og Løgtingsskrivstovan siga seg ikki hava havt stundir at viðgera lógaruppskotið gjølla.

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (2:3)
40585
Mikudag 27. mars
Frætt og fregnað 1 (1:3)
40584