- Tíðindi, mentan og ítróttur
Fleiri hava avhendað ólóglig skotvápn
Tað hjálpti tá løgreglan herfyri bað fólk um at avhenda ólóglig skotvápn uttan at fólk vórðu revsað, tá tey lótu løgregluni ólógligu skotvápnini.
- Higartil í ár hava vit fingið til samans fimm ólóglig skotvápn frá fólki, sigur Heri Andreassen, vaktleiðari á politistøðini í Havn.
So seint sum í gjár fekk løgreglan eina 100 ára gamla salongrifflu, eina kaliber .22, frá fólki í Klaksvík, sigur vaktleiðarin á politistøðini.
Ein revolvari eisini latin løgregluni
Av teimum fimm ólógligu skotvápnunum, løgreglan nú hevur fingið, eru riflur, salongrifflur, lóður og eisini ein revolvari.
Vápnalógin í Føroyum varð herd á nýggjárinum, og tað fyrsta ólógliga skotvápnið varð latið løgregluni í februar mánað, sigur Heri Andreassen.
Fólk kunnu fram til 30. juni lata ólóglig skotvápn til løgregluna í Føroyum uttan revsitiltøk. Vanligar høglbyrsur eru tó undantiknar herdu vápnalógini.