Avhoyringar lidnar

Støða er ikki tikin til um tríggir menn umborð á Polar Nanoq, sum eru avhoyrdir í málinum um eina horvna gentu, skulu varðhaldsfongslast

Løgreglan er liðug at avhoyra tríggjar menn, sum eru við trolaranum, Polar Nanoq, eftir at ein genta í Reykjavík hvarv um vikuskiftið

Beinta Løwe

Bjarni Mohr

19.01.2017 - 10:06

Avhoyringin av monnunum, ið vórðu handtiknir umborð á grønlendska trolaranum, Polar Nanoq, er liðug, sigur íslendska kringvarpið, RUV.

Enn er støða ikki tikin til, um løgreglan fer at biða um at fáa mennirnar varðhaldsfongslaðar. Íslendska løgreglan gjørdi kanningar á trolaranum, ið kom á Hafnafjørðin mikukvøldið.

SÍ EISINI Tíðartalvan í málinum um horvnu Birnu Brjánsdóttir

Men kanningarleiðarin hjá íslendsku løgregluni vil ikki siga, um løgreglan fann nakað illgrunavert umborð á grønlendska trolaranum.

Sambært RUV er ongin annar av manningini á trolaranum undir illgruna. Íslendska løgreglan hevur leitað eftir einari 20 ára gamlari gentu síðani leygarkvøldið.

Ein reyður bilur er sæddur á vakmyndatólum koyra fram við gentuni. Bilurin er eisini sæddur á vakmyndatólum í Havnini í Hafnarfirði, har grønlendski trolarin lá við bryggju.