Óvissa um grønlendsku fiskivinnunýskipanina

Enn er óvist, nær uppskotið um nýggja fiskivinnulóg í Grønlandi verður lagt fyri landstingið.

Nýggi landsstýrismaðurin í fiskivinnumálum, Erik Jensen, sigur við Sermitsiaq, at tað er torført siga, nær uppskotið verður liðugt, men tað verður í hesum valskeiðnum, sigur hann.

Nýggja landsstýrissamgongan ætlar, at viðurskiftini í fiskivinnuni skulu broytast soleiðis, at fleiri arbeiðspláss verða í vinnuni.

- Nýggja fiskivinnulógin skal eisini hava týdning fyri búskapin, og tí brúka vit tíðina, sum krevst, at gera uppskotið. Samráðast skal við partarnar í vinnuni, og teir skulu eisini hava eina hoyringarfreist, sigur landsstýrismaðurin í fiskvinnumálum.

Ein knappan mánað eftir landstingsvalið í Grønlandi hevur flokkurin, Parti Naleraq, mist ein tingmann, men tað fær onga ávirkan á samgongumeirilutan. 

Henrik Fleischer fer úr Parti Naleraq upp í Siumut, sum eisini er í samgongu.

Hans Enoksen, formaður í Parti Naleraq, harmast støðuna. 

Hann sigur við Sermitsiak, at Henrik Fleischer fer úr flokkinum, av tí at hann eftir øllum at døma er misnøgdur við nevndarbýtið í landstinginum.