- Tíðindi, mentan og ítróttur
Juncker vil hava summartíð alt árið
4,6 milliónir fólk kunnu ikki mistaka seg.
Tað tykist formaðurin í ES-nevndini, Jean-Claude Juncker, hava hugsað, nú hann letur upp fyri møguleikanum at taka skipanina við summar- og vetrartíð av, sigur týska sjónvarpsstøðin, ZDF.
Í juli varð skipað fyri einari hoyring, har ES-borgarar og áhugafelagsskapir kundu siga sína hugsan um skipanina.
Hoyringarfreistin var 16. august, og út frá teimum 4,6 milliónum viðmerkingunum, sum komu inn, er áhugi fyri, at summartíðin skal vera varandi, sigur ZDF.
- Vit eiga at lurta eftir tí, sum fólk halda, sigur Juncker við týsku sjónvarpsstøðina.
Í februar samtykti ES-tingið at endurskoða fyriskipanina um summar- og vetrartíð.
Men bæði ES-ráðið og tingið skulu viðgera eitt uppskot frá ES-nevndini, áðrenn málið kann samtykkjast endaliga.