Jobmatch: fleiri arbeiðsgevarar enn nakrantíð áður

61 arbeiðsgevarar eru við á Jobmatch í ár. Og tað er met. Í fjør vóru 52 arbeiðsgevarar við.

Tíggju fyrilestrar verða í ár.

Jobmatch ráðstevnan er seinnapartin í dag í Norðurlandahúsinum. Hon byrjar klokkan eitt.

Á Jobmatch hittast arbeiðsgevarar, bæði privatir og almennir, og lesandi, nýútbúgvin og onnur.

Fólk fáa eitt yvirlit yvir møguleikar fyri starvi, uppgávum og starvsvenjing í Føroyum. 

Og fólk hava eisini møguleika at bjóða seg fram hjá fyritøkum, kommunum og stovnum. 

Nógv leys størv

Annan jóladag vóru 44 leys størv at søkja á Jobmatch.

Í ár er eisini ein kunningarbásur.

Í honum eru serkøn fólk í arbeiðsmarknaði, tey eru úr Vinnuhúsinum, í yrkisvegleiðing, tey eru úr Altjóða skrivstovuni og  Útlendingastovan er serkøn í immigratión, innflyting. 

Felagið Syntesa byrjaði Jobmatch í 2008 fyri, sum Syntesa sigur, at tryggja framhaldandi vøkstur og menning í føroyska samfelagnum.

Endamálið var at gera tað møguligt at skapa og viðlíkahalda sambandið millum føroyska arbeiðsmarknaðin og lesandi, nýútbúgvin og útisetar sum heild.

Í 2015 bleiv málbólkurin víðkaður til eisini at fevna um útbúgvin fólk við royndum, tað eru tey sum eru í starvi, men hava áhuga í at kunna seg um nýggjar møguleikar.

Í stýrisbólkinum fyri Jobmatch eru Tórshavnar kommuna, Vinnuhúsið, Altjóða skrivstovan og Meginfelag føroyskra studenta.

Á heimasíðuni jobmatch.fo eru nógvar upplýsingar um Jobmatch, millum annað, hvørjir teir 61 arbeiðsgevararnir eru, sum eru við í ár.