- Tíðindi, mentan og ítróttur
Vænta minni framgongd í heimsbúskapinum
Heimsbankin, Altjóða Valutagrunnurin, IMF og Asiatiski Menningarbankin hava allir minkað væntaðu framgongdina í heimsbúskapinum.
Tað er serliga handilskríggið ímillum USA og Kina, sum er orsøkin til tað, sigur japanski tjóðbankastjórin, Haruhiko Kuroda, við CNBC. Kina hevur kunngjørt gongdina fyri mars.
Gongdin vísir, at útflutningurin vaks 14 prosent, men innflutningurin minkaði 7,6 prosent. Tað er júst verjutollur, sum myndar heimshandilin í dag, og tí er vandi á ferð, sigur japanski tjóðbankastjórin.
IMF lækkað metingina tríggjar ferðir
Virðið á partabrøvum er hækkað nógv í ár, men tað heldur japanski tjóðbankastjórin koma av, at íleggjarar vænta eina loysn í handilsstríðnum ímillum USA og Kina.
Men samstundis hevur Altjóða Valutagrunnurin lækkað metingina um heimsbúskapin tríggjar ferðir í ár. IMF sigur seinastu metingina byggja á, at viðurskiftini ímillum USA og Kina ikki fara at versna.
Verður ein loysn ikki funnin, so kann tað fáa størri ávirkan á gongdina, sigur Haruhiko Kuroda. Hóast tað gongur frægari í Kina, so eru metingarnar, at búskaparvøksturin fyrsta fjórðingsár verður 6,3 prosent, og tað er tað lægsta seinastu 27 árini.