Bretskur sendimaður finst hvassliga at Trump

Óbrúkiligur, ósikkur og óskikkaður. Hesi hvøssu orðini eigur Kim Darroch, bretski sendimaðurin í USA. Og tey eru søgd um Donald Trump, forseta.

Tað er komið fram nú skjøl í trúnaði hjá sendimanninum eru almannakunngjørd.

Sambært Kim Darroch eru Hvítu Húsini bæði dysfunktionel og sundrað undir leiðsluni hjá Donaldi Trump. Eisini finst Darroch hvassliga at Trump í mun til samráðingar hjá USA við onnur lond. 

Aktuella stríðið millum USA og Iran verður eisini nevnt í skjølunum. Darroch sigur, at handfaringin hjá USA mótvegis Iran er ósamanhangandi og kaotisk. 

Bretska uttanríkisráðið kallar almannakunngerðina av skjølunum fyri ónda, men bretska uttanríkisráðið avvísir ikki innihaldið. 

Ein talsmaður hjá bretsku sendistovuni í USA sigur við BBC, at bretska sendistovan í Washington og Hvítu Húsini hava eitt strekt samband, sum ikki viknar, hóast atfinningarnar hjá Darroch mótvegis Trump eru hvassar og nú eisini almannakunngjørdar.