Íslendski forsetin vitjar Musikkskúlan í Sørvági

Fín vitjan kom úr Íslandi í dag.

Íslendski forsetin og forsetafrúan lendu í Vágum seinnapartin í dag, og tey bæði verða í Føroyum í fimm dagar.

Og tað er ikki á hvørjum degi, at ein forseti vitjar í Føroyum. Tí funnu tey eisini reyða leyparan fram til høvið.

Tað er løgmaður, sum er vertur fyri vitjanini. Tá Guðni Thorlacius Jóhannesson hevði tikið í hondina á løgmanni, løgmansstjóranum og hinum, vitjaðu teir millum annað Musikskúlan í Sørvági.

Og har vóru tey sum vera man spent.

Í morgin heldur íslendski forsetin almennan fyrilestur á Fróðskaparsetrinum. Fyrilesturin eitur "Stríðið um fiskigrunnarnar - ymiskir vegir til felags mál."