- Tíðindi, mentan og ítróttur
Nón
Dansifrøði hevur í fjørheyst og í vetur skipað fyri skeiðum í latínamerikanskum dansum. Og í gjár byrjaðu summarskeið í latínamerikanskum dansum fyri ávikavist børn, ung, kvinnur og pør, sum verða hóskvøld í mai og juni.
Undirvísari er Luisa Sofía Eliasen, sum hevur dansað síðani hon var heilt lítið, og sum er fleirfaldaður barna- og junior Danmarksmeistari í sportdansi.
At dansa er fantastiskt og lívsjáttandi og gevur eina góða kenslu í kroppinum, heldur Luisa Sofía. Men at dansa sportdans á elitustøði er eisini sera krevjandi og hart, og kann hava neiligar fylgjur, vísur hon á.
Luisa Sofía er 20 ár, men tá hon var umleið 15, noyddist hon at gevast at dansa á elitustøði, tí kroppurin ikki kláraði meira. Hon fekk skaðar í bæði knøum og mjødnini og rygginum. Nú undirvísur hon í dansi, og ætlar hon sær at fara undir útbúgving næsta ár.
Pápi Luisu Sofíu er føroyskur, mamman er úr Peru, og hon er uppvaksin í Aarhus í Danmark. Uppvøkstur hennara er sostatt myndaður av trimum sera ymiskum mentanum, og hevur hetta eisini verið við til at myndað hana sum menniskja. Millum annað hevur upprunin úr Peru helst havt við sær, at henni altíð hevur dámað sera væl latínamerikanska rútmur og at dansa, og hesin uppruni hevur samstundis givið henni disciplin, vísur hon á.
Vit tosa við Luisu Sofíu um hennara lív við dansi, og hvussu tað er at vaksa upp við trimum rættiliga ymiskum mentanum, tí føroysku, tí perusku og tí donsku mentanini.
Til ber at lesa meira um skeiðini í latínamerikanskum dansi á www.dansifroi.fo.