Landsverk fær fleiri veðurstøðir

Fólk frá Landsverki hava sett eina nýggja veðurstøð við
Velbastaðháls, og um 14 dagar verður ein nýggj veðurstøð sett upp við
Oyndarfjarðarvegin fyri hana, sum koppaði í ódnini í november.
<p>Eisini veðurstøðirnar á Høgareyni og Norðradalsskarði fingu skaða í
illveðrinum í vetur, og verða umvældar í næstum. Støðin á Høgareyni koppaði, og
bæði mastur, akkumulatorskáp og sólpallarnir fingu skaða. Tí er neyðugt at seta eina nýggja &nbsp;sterkari mastur upp har. Veðurstøðin á Norðradalsskarði fekk skaða á
sólpallarnar, akkumulatorskápið og hitamátarin, og má eisini umvælast.
<br>&nbsp;<br>Meðan nýggjar støðir verða settar upp á hesum støðum, er veðurstøðin,
sum hevur staðið í økinum, har skúladepil skal byggjast við Marknagil, nú tikin
niður. Støðin hevur mátað veður og vind í sambandi stóru byggiverkætlanina við
Marknagil, og henda kanningaruppgávan er nú liðug. </p>
<p>Arbeitt verður miðvíst fram ímóti at fáa eina betri kunning til borgararnar
um veðrið í vetrarhálvuni, sigur Landsverk. Málið er, at øll, sum
hava veðurupplýsingar fyri neyðini, skulu fáa fatur á teimumso skjótt og lætt
sum yvirhøvur til ber allar tíðir á samdøgrinum.</p>
<p>- Sjálvt um byrjanartrupulleikar hava verið við veðurstøðunum, so hevur neyvt
eftirlit, tillagingar og støðug menning havt við sær, at vit hava nútímansgjørt
vetrartænastuna hjá Landsverki. Úrslitið er, at tænastustigið á kunningarøkinum
er hækkað munandi, samstundis sum vit hava spart pening, sigur Gunnlaugur
Sighvatsson á deildini fyri undirstøðukervii, sum hevur dagligu ábyrgdina av
veðurstøðunum hjá Landsverki. </p><p>Við nýggju og umvældu veðurstøðunum hevur Landsverk tilsamans 26 veðurstøðir kring landið, og tær veita upplýsingar um hita, vind, luftvætu, vætu á vegnum, avfall og lufttrýst 10. hvønn minutt alt samdøgrið. 15 støðir eru eisini útgjørdar við myndatóli.</p><p><i>Mynd: Veðurstøðin í Oyndarfirði koppaði í ódnarveðrinum í november. Ein nýggj støð verður sett upp um einar 14 dagar</i></p><p><br></p><p><br></p><p><br></p>