Kringvarpið skal virka í fólksins tænastu, og tilfarið, ið vit framleiða, skal vera viðvirkandi til, at Føroya fólk gerst betur ført fyri at taka støðu til og ávirka samfelagsgongdina á ein fólkaræðisligan hátt. Stovnurin bindur seg til at tryggja eitt breitt útboð av sendingum og tænastum, og málbólkurin fevnir um allar aldrar og áhugamál. Sendingarnar hjá Kringvarpinum skulu m.a. fevna um sakligan og óheftan tíðindaflutning, upplýsing, mentan og undirhald. Virksemið hjá Kringvarpi Føroya er óheft av politiskum, fíggjarligum og handilsligum áhugamálum.