Ógegni: Flyta starvsfólk úr Fiskimálaráðnum

<div>Royndi samráðingarleiðarin í makrelmálinum, Andras Kristiansen, hevur fingið boð um, at hann fyribils skal arbeiða fyri løgmann og ikki í Fiskimálaráðnum, har hann hevur verið deildarleiðari í fleiri ár.</div><div><br></div><div>Tað skrivar løgmaður í brævi til Fiskimálaráðið, sum útvarpið hevur fingið innlit í.</div><div><br></div><div>Orsøkin er, &nbsp;at landsstýrismaðurin í fiskivinnumálum, Jákup Mikkelsen, er ógegnigur í millum annað málinum um býtiðnum av makrelkvotuni og býtinum av føroysku kvotuni í fiskivinnuavtaluni við Grønland.</div><div><br></div><div>Tí kunnu hesi mál ikki viðgerast í Fiskimálaráðum, og løgmaður hevur tí gjørt av sjálvur at taka sær av víðari samráðingunum um makrelin og fiskivinnuavtalurnar við Grønland.</div><div><br></div><div>Og at hjálpa sær hevur hann í fyrsta umfari fingið Andras Kristiansen, sum hevur drúgvar royndir í samráðingunum um makrelin. Seinni verða eftir øllum at døma fleiri starvsfólk flutt úr&nbsp;Fiskimálaráðnum, tí landsstýrismaðurin í fiskivinnumálum hevur gegnistrupulleikar.</div><div><br></div><div>Í skrivinum stendur, at í sambandi við hesi mál verða avís starvsfólk í Fiskimálaráðnum, fyri fyrst Andras Kristiansen, deildarstjóri, flutt á Løgmansskrivstovuna at starvast, meðan hesi mál verða viðgjørd.</div><div><br></div><div>Og hetta ber eftir øllum at døma til, hóast embætisfólkini í Fiskimálaráðnum í útgangsstøðinum øll eru ógegnig, tá teirra landsstýrismaður er ógegnigur.</div><div><br></div><div>Sambært eini frágreiðing hjá Fólkatingsins Umboðsmanni ber til at flyta starvsfólk millum ráð í slíkum førum fyri at tryggja, at fakkunnleikin fylgir við, tá mál verða flutt, tí ráðharrin er ógegnigur.</div><div><br></div><div>Hvussu nógv fólk nú verða flutt úr Fiskimálaraðunum á Løgmansskrivstovuna, er ógreitt.</div><div><br></div><div>Heldur ikki er greitt, um hesi starvsfólkini skulu flyta millum Fiskimálaráðið og Løgmansskrivstovuna alt eftir, hvar málini skulu viðgerast, og hvussu gegnið hjá landsstýrismanninum í fiskivinnumálum kann hugsast at ávirka tey.</div><div><br></div>