Dregur út at avgreiða blokkin

Tað dregur út hjá løgtinginum at avgreiða málið um heildarveitingina úr danska ríkiskassanum í ár.<div><br></div><div>Tá uppskotið varð lagt fram í desember, høvdu ongar samráðingar verið millum landsstýrið og ríkismyndugleikarnar um at hækka blokkin, og tí stóð gamla upphæddin, 615,5 milliónir krónur, í uppskotinum. Víst varð tó á í viðmerkingunum til uppskotið, at samráðingar skuldu verða við stjórnina, og fyrr enn tær høvdu verið, bar ikki til at siga, hvussu stór endaliga ríkisveitingin verður í ár.&nbsp;</div><div><br></div><div>Síðani hava samráðingar verið, og avtalað er, at heildarveitingin verður prístalsviðgjørd. Tí hækkar veitingin 8,6 milliónir upp í 624,1 millión krónur í ár.</div><div><br></div><div>Fólkatingið hevur viðgjørt uppskotið frá danska fíggjarmálaráðharranum um at prístalsviðgera blokkin, og ætlanin var at avgreiða málið í hesi vikuni, men tað ber ikki til, tí bíðað verður eftir endaligu viðgerðini í løgtinginum.</div><div><br></div><div>Og líkt er til, at fólkatingið noyðist at bíða eina løtu aftrat, tí málið er framvegis til viðgerðar í fíggjarnevndini. Nevndin hevði fund um málið fyrrapartin, og tað er aftur á skrá fyri fundin í fíggjarnevndini, sum verður týsdagin.</div><div><br></div><div>Av tí at eingin lóg um heildarveiting úr ríkiskassanum er í gildi í løtuni, hevur eingin blokkur verið útgoldin í hesum árinum.&nbsp;</div><div><br></div><div><i>Mynd: Fíggjarnevndin viðger framvegis uppskotið um heildarveitingina fyri 2012.</i></div>