Tey dripnu í Grønlandi vórðu sligin í høvdið

<div>Grønlendska løgreglan hevur nú almannakunngjørt fleiri upplýsingar um sorgarleikin í lítlu grønlendsku bygdini Nutaarmiut í gjár.</div><div><br></div><div>Tey dripnu eru ein 75 ára gomul kvinna, ein 31 ára gomul kvinna og ein átta ára gomul genta. Sambært løgregluni eru tær í familju.</div><div><br></div><div>Fyrstu kanningar í málinum vísa, at tey deyðu eru sligin í høvdið. Løgreglan sigur seg hava funnið fleiri lutir, ið kunnu vera gerningsvápnið.</div><div><br></div><div>Umframt tey deyðu hava tveir menn, 81 og 32 ára gamlir, verið fyri drápsroynd. Hjá báðum stendur um lív, og verða teir seinni í dag fluttir á Ríkissjúkrahúsið í Keypmannahavn.&nbsp;</div><div><br></div><div>Løgreglan hevur handtikið ein 22 ára gamlan mann úr bygdini Nutaarmiut, sum fyrr í dag var í grundlógaravhoyring, skuldsettur fyri trý dráp og fýra drápsroyndir.&nbsp;</div><div><br></div><div>Løgreglan er av tí fatan, at tveir persónar, ein 24 ára gomul kvinna og eitt tvey ára gamalt barn, eisini vóru fyri drápsroynd. Tey bæði sluppu tó snikkaleys.</div><div><br></div><div>Enn dugir grønlendska løgreglan einki at siga um, hvat motivið hjá 22 ára gamla manninum var. Løgreglan hevur nú leitað sær hjálp frá kriminalteknikarum úr Danmark.</div><div><br></div><div>Krepputilbúgving er sett í verk í bygdini Nutaarmiut, har umleið 50 fólk búgva.&nbsp;</div><div><br></div><div><br></div>