Kanna aftur makrel undir Føroyum í ár

<p style="font-style: normal; ">Havstovan fer aftur í ár at kanna makrel, meðan hann er í føroyskum sjógvi.</p><p style="font-style: normal; ">Fiskivinnugransking hevur játtað Havstovuni 100.000 krónur til eina
verkætlan at kanna innihaldið av fiti í makreli.</p><p style="font-style: normal; ">Endamálið er at kanna,
hvussu nógv innihaldið av fiti veksur, frá tí at makrelurin kemur í føroyskan
sjógv um várið, til hann fer úr aftur føroyskum øki út á heystið. Eisini verður
kannað, hvussu nógv vektin økist í hesum tíðarskeiðinum.</p>
<p style="font-style: normal; ">Tá hann hevur gýtt um várið, ferðast makrelurin norðureftir at leita sær føði.
Tá er hann millum annað í føroyskum sjógvi, har hann etur seg feitan, áðrenn hann
aftur fer úr okkara øki út á heystið. Kanningin verður gjørd í samstarvi við p/f
Faroe Pelagic.</p>
<p style="font-style: normal; ">Í fjør gjørdi Havstovan saman við Faroe Pelagic eina undankanning at
kanna fiti í makreli. Kanningin byrjaði um hálvan mai, og vardi til fyrst í
oktober, tá fiskiskapurin helt uppat. Í hesum tíðarskeiðinum varð
innihaldið av fiti í makrelinum, ið var landaður til Kollafjørð Pelagic,
mátað. Kanningin fevndi tilsamans um 64 landingar hjá uppsjóvarskipunum, frá mai til september</p>
<p style="font-style: normal; ">Fyribilsúrslit av kanningunum vísti, at innihaldið av fiti hjá makreli vaks úr umleið tveimum prosentum upp í umleið 30 prosent, frá hálvum mai til fyrst í oktober.Serliga í
jun imánaði fitnaði makrelurin nógv, úr 10 upp í 25 prosent. Síðani broyttist
fitin ikki nógv.&nbsp;</p>
<p style="font-style: normal; ">Umframt at máta innihald av fiti í makrelinum, er ætlanin í ár eisini at
máta, hvussu nógv makrelstovnurin veksur í vekt, meðan
hann er í føroyskum sjógvi.</p><p><i>Mynd: Kanningin hjá Havstovuni verður gjørd í samstarvi við Faroe Pelagic í Kollafirði</i></p>