Ternan mundi verðið niðursigld

Tað var um reppið, at strandfaraskipið Ternan varð niðursiglt í Nólsoyarfirði av íslendska farmaskipinum, Arnarfelli. Hevði skiparin á Ternuni ikki dreygað undan, høvdu skipini uttan iva stoytt saman.

Íslendska skipafelagið Samskip viðgongur, at manningin á Arnarfelli gjørdi eitt mistak, tá bingjuskipið Arnarfell mundi siglt strandfaraskipið Ternuna niður í Nólsoyarfirði.

Tað var síðsta mánakvøld, at Arnarfell var á veg gjøgnum Nólsoyarfjørð. Bingjuskipið kom úr Kollafirði og skuldi til Íslands. Ternan var á veg av Havnini til Nólsoyar.

Bara 2-300 metrar millum skipini

Íslendska ríkisútvarpið segði frá hendingini í gjár. Ternan noyddist at snara fyri at sleppa undan samanstoyti. Bara 200 til 300 metrar vóru millum skipini, tá Ternan snaraði.

Tá Arnarfelli var farið fram við Ternuni, setti Ternan ljóskastaran á hekkuna á skipinum, fyri at síggja navnið, og síðani kallaði skiparin á Ternuni á íslendska skipið.

Sambært íslendska útvarpinum hava Samskip viðgingið, at manningin á Arnarfelli bar seg skeivt at. Samskip hava boðað íslendsku skaðanevndini frá hendingini. 

Meiri verður at frætta í útvarpstíðindunum.