- Tíðindi, mentan og ítróttur
Rindar onga samsýning aftur
<p>Fíggjarmálaráðið krevur, at fyrrverandi stjórin á Føroya Handilsskúla, Reidar Nónfjall, rindar stýrinum fyri skúlan útivið 500.000 krónur aftur.</p><div><br></div><div>Fíggjarmálaráðið sigur, at Reidar Nónfhjall hevur av órøttum fingið 15.000 krónur í nevndarsamsýning um mánaðin í sambandi við byggingina av skúladeplinum í Marknagili, tí stýrið hevði ikki heimild at lata hesa upphædd.</div><div><br></div><div><b>Tvær nevndir</b></div><div><br></div><div>Tvær bygginevndir hava arbeitt við Marknagilsdeplinum, og nevndirnar hava fingið tilsamans eina millión og 573.000 krónur í samsýning. Fíggjarmálaráðið heldur, at samsýningarnar, sum vórðu latnar fyrru bygginevndini í eitt ár, eru í lagi. </div><div><br></div><div>Men í 2008 kom ein nýggj lóg. Mentamálaráðið verður byggiánari og Landsverk byggiharri. Føroya Studentaskúli og HF-skeið koma upp í byggiætlanina, og ein víðkað bygginevnd verður sett.</div><div><br></div><div>Fíggjarmálaráðið sigur, at Reidar Nónfjall átti at vitað, at tilnevning hansara í seinnu bygginevndini kemur úr Mentamálaráðnum og ikki frá Føroya Handilsskúla. At hann skal halda, at samsýningin framvegis skal koma frá skúlanum, sum einki var hent, er óskiljandi, sigur Fíggjarmálaráðið í síni niðurstøðu.</div><div><br></div><div>- Hann hevur ongantíð roynt at fáa viðurskiftini í rættlag, og tað er átaluvert, tí eingin formlig góðkenning frá rætta myndugleika fyriliggur, sigur Fíggjarmálaráðið, sum krevur at fáa peningin aftur.</div><div><br></div><div><b>Rindar einki aftur</b></div><div><br></div><div>Reidar Nónfjall sigur við útvarpið, at hann vísir øllum skuldsetingum frá Fíggjarmálaráðnum aftur.</div><div><br></div><div>- Grundgevingarnar eru heilt burturvið, og eg ætli mær hvørki at rinda pengarnar aftur, ella gera nakra semju við stýrið. So má málið heldur enda í rættinum, sigur fyrrverandi stjórin á Føroya Handilsskúla.</div><div><br></div><div>Niels Vinther, nývaldur formaður í stýrinum fyri Handilsskúlan, sigur, at hann hevur onga viðmerking, fyrr enn stýrið hevur viðgjørt brævið frá Fíggjarmálaráðnum. </div><div><br></div><div><i>Mynd: Reidar Nónfjall, fyrrverandi stjóri á Føroya Handilsskúla (Portalurin)</i></div>
