- Tíðindi, mentan og ítróttur
Vit eru 145 færri í Føroyum
<div>Fólkatalið minkar støðugt. 1. januar í ár vóru vit 145 fólk færri enn á nýggjárinum í fjør</div><div><br></div><div>Í fjør var burðaravlopið 212, men tá tað vórðu 357 fleiri, sum fluttu úr Føroyum enn til Føroya, minkar fólkatalið. 1. januar vóru 48.372 fólk skrásett at búgva í Føroyum.</div><div><br></div><div>Í 2011 vórðu 575 børn fødd, og so lágt hevur burðartalið ikki verið síðani fyri seinna heimsbardaga, skrivar Hagstovan á netinum.</div><div><br></div><div>2011 var triðja árið á rað, at fólkatalið minkaði. Hagstovan vísir á, at seinastu trý árini eru fleiri enn 1.000 fólk flutt av landinum. Í 2009 minkaði fólkatalið við 115 fólkum, í 2010 við 24 fólkum og í fjør við 145 fólkum.</div><div><br></div><div>Hagstovan hevur ikki góðar vónir um, at gongdin í fólkatalinum broytist, kemur vend ikki í. Tí við færri nýføðingum og vaksandi fráflyting, fækkast kvinnurnar í burðardyggum aldri eisini. Og tí er eingin beinleiðis ábending um, at fleiri børn verða fødd næstu árini, skrivar Hagstovan á netinum.</div><div><br></div><div>Aldursbólkurin, sum hevur størsta føðitíttleikan, eru tær 25 til 29 ára gomlu kvinnurnar. Men hesin aldursbólkur er fækkaður, úr 1559 í 2002 og heilt niður á 993 í 2012 - afturgongdin er 36 prosent eftir 10 árum. Og aldursbólkurin beint undir hesum - tær 20 til 24 ára gomlu - er eisini fækkaður við 33 prosentum hetta tíðarskeiðið.</div><div><br></div><div>Størsta minkingin í fólkatalinum í fjør var í Tórshavnar, Nes, Runavíkar, Sands, Tvøroyrar og Sørvágs kommunum. Lutfalsliga var minkingin størst í Kunoyar, Húsa og Sands kommunum.</div><div><br></div><div>Hinvegin vaks fólkatalið í Klaksvíkar, Vága, Vestmanna og Sunda kommunum.</div><div><br></div>
