- Tíðindi, mentan og ítróttur
Smyril Line góðar níggju milliónir í avlopi
<p>Fyri fyrstu ferð í fleiri ár hevði Smyril Line avlop í fjør. Vinningurin var 9,3 milliónir krónur, og úrslitið er 25 millónir krónur betri enn í fyrraárið, tá hallið var 15,7 milliónir krónur.</p><div><br></div><div>Tað eydnaðist at fáa yvirskot, hóast oljuútreiðslurnar í fjør vóru 10 milliónir krónur størri enn í 2010.</div><div><br></div><div>Smyril Line sigur, at høvuðsorsøkin til, at úrslitið batnaði, er størri søla og munandi sparingar í rakstrinum. Raksturin var slakar 19 milliónir krónur bíligari í fjør enn árið fyri. Størstu sparingarnar eru í umsitingini og lønarútreiðslum.</div><div><br></div><div>Í november í fjør varð kapitalgrundarlagið hjá Smyril Line styrkt við 40 milliónum krónum, og samstundis er gjaldførið næstu árini bøtt við 150 milliónum.</div><div><br></div><div><b>Útlitini eru góð</b></div><div><br></div><div>Smyril Line sigur, at útlitini eru góð. Dentur verður lagdur á at bjóða betri tænastu umborð á Norrønu, og roynt verður at spara enn meiri í rakstrinum. Men oljuprísurin er framvegis ein avjóðing, sigur felagið.</div><div><br></div><div>Jens Meinhard Rasmussen heldur fram sum nevndarformaður í Smyril Line eftir aðalfundin í dag. Hinir nevndarlimirnir eru Teitur Poulsen, Linda Bjørk Gunnlaugsdóttir og Hendrik Egholm.</div><div><br></div><div>Stjóri í Smyril Line er Rúni V. Poulsen. </div>
