- Tíðindi, mentan og ítróttur
Umsitingin í løgtinginum steðgar skattauppskoti
<div>Umsitingin í løgtinginum hevur steðgað uppskotinum hjá landsstýrinum at prísjavna skattastigan og at hækka barnafrádráttin.</div><div><br></div><div>Í uppskotinum, sum landsstýrismaðurin í fíggjarmálum hevur lagt fyri løgtingið, verður mælt til at javna skattastigan 1. november hvørt ár, samanborið við miðalprístalið. Somuleiðis at hækka barnafrádráttin við 1.000 krónum fyri hvørt barn um árið.</div><div><br></div><div>Men umsitingin í løgtinginum hevur í fyrstu atløgu steðgað uppskotinum. Víst verður til grein 41 í stýriskipanini, at eingin beinleiðis ella óbeinleiðis skattur má verða álagdur, broyttur ella avtikin uttan við løgtingslóg.</div><div><br></div><div>Formansskapurin í løgtinginum skal tí taka støðu til, um málið eigur at verða burturvíst. Hevur formansskapurin somu áskoðan, sum embætisfólkini í løgtinginum, at uppskotið gongur ímóti stýriskipanarlógini, skal løgtingsformaðurin mæla løgtinginum til at vísa uppskotinum burtur.</div><div><br></div><div><b>Skattatrýstið hækkar</b></div><div><br></div><div>Í viðmerkingunum til uppskotið skrivar Jørgen Niclasen, landsstýrismaður, og Atli Suni Leo, aðalstjóri, at verður skattastigin ikki prísjavnaður, fer</div><div>skattatrýstið at hækka.</div><div><br></div><div>- So hvørt sum inntøkurnar í samfelagnum hækka, hækkar landsskatturin lutfalsliga meir. Við skattastiganum, ið var galdandi til 1. januar 2012, hækkaði landsskatturin 1,7 prosent, tá inntøkurnar hækkaðu 1 prosent.</div><div><br></div><div>Men uppskotið hjá teimum báðum sleppur ikki ígjøgnum nálareygað hjá umsitingini.</div><div><br></div><div>Skulu skattgjaldarar sleppa undan, at skattatrýstið hækkar, og skulu barnafamiljur sleppa eitt sindur lættari, má uppskotið hjá Fíggjarmálaráðnum halda seg innan fyri stýriskipanina.</div>
