Stórur meiriluti fyri at víga samkynd

Við stórum meiriluta samtykti Fólkatingið í dag endaliga lógina, ið loyvir samkyndum verða vígd í kirkju. Orðaskiftið við triðju viðgerð vardi meiri enn tríggjar tímar.

Tá málið kom til atkvøðugreiðslu, atkvøddu 85 fyri, 24 atkvøddu ímóti, og tveir limir atkvøddu blankt.

Ikki í fólkatingssalinum

Tinglimirnir í Javnaðarflokkinum, Sosialistiska Fólkaflokkinum, Teimum Radikalu, Eindarlistanum og Liberal Alliance atkvøddu øll fyri uppskotinum, meðan Danski Fólkaflokkurin atkvøddu ímóti.

Úr Vinstra atkvøddu 18 fyri og níggju ímóti, í Konservativa Flokkinum atkvøddu fýra fyri og tvey ímóti.

Fólkatingslimirnir úr Føroyum og Grønlandi vóru ikki staddir í fólkatingssalinum, meðan atkvøtt varð, eins og 62 aðrir fólkatingslimir.